Usa: హమాస్ స్పందన ఆమోదయోగ్యం కాదు.. అమెరికా ప్రతినిధి విట్కాఫ్
Play all audios:
అమెరికా చేసిన కాల్పుల విరమణ ప్రతిపాదనకు హమాస్ సూచించిన సవరణలపై ఆ దేశ ప్రతినిధి స్టీవ్‌ విట్కాఫ్ స్పందించారు. ఇంటర్నెట్‌డెస్క్‌: గాజాలో కాల్పుల విరమణకు సంబంధించి అమెరికా చేసిన ప్రతిపాదనకు
హమాస్ (Hamas) అంగీకరించిన సంగతి తెలిసిందే. అయితే, యూఎస్‌ ప్రతిపాదనకు హమాస్ కొన్ని సవరణలు సూచించింది. దీనిపై తాజాగా అమెరికా (USA) ప్రతినిధి స్టీవ్‌ విట్కాఫ్ స్పందించారు. హమాస్ చర్య
ఆమోదయోగ్యం కాదని, శాంతి నెలకొల్పాలనే తమ చర్యను ఇది వెనక్కి నెట్టేస్తోందన్నారు. హమాస్ స్పందనపై విట్కాఫ్ ఎక్స్‌లో ఒక పోస్టు పెట్టారు. ‘అమెరికా చేసిన ప్రతిపాదనకు హమాస్ స్పందించింది. అది
పూర్తిగా ఆమోదయోగ్యం కాదు. ఇది శాంతి నెలకొల్పాలనే మా చర్యను వెనక్కి నెట్టేస్తోంది. మా ప్రతిపాదనకు హమాస్ అంగీకరించాలి. అప్పుడే కాల్పుల విరమణపై చర్చలు వెంటనే ప్రారంభించవచ్చు. 60 రోజుల కాల్పుల
విరమణ ఒప్పందానికి ఇదే ఏకైక మార్గం. ఇందులో భాగంగా మీ దగ్గర సజీవంగా బందీలుగా ఉన్నవారు ఇంటికి తిరిగి వస్తారు. శాశ్వత కాల్పుల విరమణకు చేరుకోవడానికి ఈ చర్చలు ఎంతో ఉపయోగపడతాయి’ అని విట్కాఫ్
పేర్కొన్నారు. * 10 మంది బందీల విడుదలకు హమాస్ అంగీకారం అమెరికా ప్రతిపాదించిన కాల్పుల విరమణకు ఇప్పటికే ఇజ్రాయెల్‌ (Israel) అంగీకరించింది. తాజాగా హమాస్ కూడా ఒప్పుకొంది. ఇందులో భాగంగా
నిర్దిష్ట సంఖ్యలో పాలస్తీనా ఖైదీలను విడుదల చేస్తే.. 10 మంది సజీవులైన ఇజ్రాయెలీ బందీలతోపాటు 18 మృతదేహాలను అప్పగించేందుకు అంగీకరించింది. అయితే, కాల్పుల విరమణ ప్రతిపాదనకు మాత్రం కొన్ని సవరణలు
సూచించింది. శాశ్వత కాల్పుల విరమణ, గాజా నుంచి ఇజ్రాయెలీ బలగాల పూర్తి విరమణ, నిరంతరాయంగా సాయం అందజేతలు కోరామని హమాస్ ప్రకటనలో పేర్కొంది.